Tag: law

Categories
Editor's Picks Law for Public Legal News Students Corner

സ്വയാശ്രയ മെഡിക്കൽ കോളേജ് ഫീസ്: സുപ്രീം കോടതി വിധി വിദ്യാർത്ഥികൾക്കും രക്ഷിതാക്കൾക്കും ആശ്വാസകരം

കേരളത്തിലെ സ്വയാശ്രയ മെഡിക്കൽ കോളേജിലെ വിദ്യാർത്ഥി പ്രവേശനവുമായി ബന്ധപ്പെട്ട് സുപ്രീം കോടതിയിൽ നിന്നും 25-02-21 ന് ഉണ്ടായ വിധി വിദ്യാർത്ഥികൾക്ക് ഗുണകരമാകാൻ സാധ്യത തെളിഞ്ഞു. ജസ്റ്റിസ് നാഗേശ്വര റാവു ജസ്റ്റിസ് രവീന്ദ്ര ബട്ട് എന്നിവരടങ്ങുന്ന ബെഞ്ചാണ് ഒരു കൂട്ടം മെഡിക്കൽ വിദ്യാർത്ഥികൾ കേരള ഹൈകോടതി വിധിക്കെതിരെ സമർപ്പിച്ച അപ്പീലിൽ സ്വയാശ്രയ മെഡിക്കൽ കോളേജ് ഫീസ് ഘടനയെ ദൂരവ്യാപകമായി സ്വാധീനിക്കുന്ന സുപ്രധാന വിധി പ്രസ്താവിച്ചത്. 2017-18 2018-19 എന്നീ ബാച്ചുകളുടെ ഫീസ് പുനർനിർണയിക്കാൻ ഫീ റെഗുലേറ്ററി കമ്മിറ്റിയോട് കേരള ഹൈകോടതി ആവശ്യപ്പെട്ടിരുന്നു. മെഡിക്കൽ കോളേജുകൾ സമർപ്പിക്കുന്ന ഓഡിറ്റ് ചെയ്ത ബാലൻസ് ഷീറ്റിന്റെയോ അതിന്റെ അഭാവത്തിൽ താൽക്കാലിക പ്രോഫിറ്റ് ആൻഡ് ലോസ് അക്കൗണ്ടിന്റെയോ അടിസ്ഥാനത്തിൽ മാത്രം ഫീ റെഗുലേറ്ററി കമ്മിറ്റി ഫീസ് നിർണയിക്കണമെന്ന കേരള ഹൈകോടതിയുടെ നിർദ്ദേശം തള്ളി ക്കൊണ്ടാണ് സുപ്രീം കോടതിയുടെ വിധി. ഫീസ് മൂന്നുമാസത്തിനകം പുനർ നിർണയിക്കാനും ഫീസ് നിർണയ തീരുമാനത്തിൽ എത്തിച്ചേരുന്നതിന് ആവശ്യമായ ഏത് വിവരവും നൽകാൻ മാനേജുമെന്റുകളോട് നിർദ്ദേശിക്കാൻ കമ്മിറ്റിക്ക് അധികാരമുണ്ടെന്നും സുപ്രീം കോടതി പറഞ്ഞു. 2017 ലെ കേരള മെഡിക്കൽ വിദ്യാഭ്യാസ(സ്വകാര്യ മെഡിക്കൽ വിദ്യാഭ്യാസ സ്ഥാപനങ്ങളിലേക്കുള്ള പ്രവേശന നിയന്ത്രണ) നിയമത്തിന്റെ വകുപ്പ് 11 ൽ നിർദേശിക്കുന്ന കാര്യങ്ങൾ പരിഗണിച്ച ശേഷമാവണം കമ്മിറ്റി ഫീസ് നിർണയിക്കേണ്ടതെന്നും സുപ്രീം കോടതി നിർദേശിച്ചു. ഇങ്ങിനെ നിശ്ചയിക്കുന്ന ഫീസ് അമിതമാകരുതെന്നും ചൂഷണ രഹിതമാണെന്ന് ഉറപ്പുവരുത്തണമെന്നും ഉത്തരവിൽ പറയുന്നുണ്ട്.

ഫലത്തിൽ വിദ്യാർത്ഥികൾക്ക് അനുകൂലമായ വിധിയാണ് സുപ്രീം കോടതി പുറപ്പെടിവിച്ചത് എന്ന് നിയമ വൃത്തങ്ങൾ ചൂണ്ടിക്കാണിക്കുന്നു. മുക്കം KMCT മെഡിക്കൽ കോളേജിന്റെ 2020-21 ബാച്ചിന്റെ ഫീസ് പുനർ നിർണയിക്കാൻ കേരള ഹൈക്കോടതി ആവശ്യപ്പെട്ടപ്പോൾ 08-02-21 ന് ഫീസ് റെഗുലേറ്ററി കമ്മിറ്റി ഹൈകോടതിയിൽ സമർപ്പിച്ച റിപ്പോർട്ടിൽ ആദ്യം നിശ്ചയിച്ച ഫീസിനേക്കാളും കുറഞ്ഞ തുകയായ 553070/- രൂപയാണ് വാർഷിക ഫീസ് ആയി നിശ്ചയിച്ചത്. ഫീ റെഗുലേറ്ററി കമ്മിറ്റിയുടെ നീതിയുക്തമായ ഈ തീരുമാനം ഇനി വരുന്ന ഫീസ് നിർണ്ണയത്തിലും പ്രതിഫലിക്കുമെന്ന് പൊതുവെ പ്രതീക്ഷിക്കപ്പെടുന്നു.

Categories
Editor's Picks Law for Public Legal News

നെറ്റിൽ കുട്ടികളുടെ അശ്ലീലം തിരയുന്നവർ കുടുങ്ങും

കുട്ടികളുടെ അശ്ലീല ചിത്രങ്ങൾ ഇന്റർനെറ്റിൽ തിരയുന്നത് പോലും കുറ്റകരമാണ് എന്ന് പലർക്കും അറിയില്ല. ഈ അടുത്ത കാലത്ത് പലപ്പോഴായി ഡാർക്ക്‌ നെറ്റിലടക്കം കുട്ടികളുടെ അശ്ലീലചിത്രങ്ങളും വീഡിയോകളും തിരയുകയും കാണുകയും ചെയ്ത വളരെ അധികം പേരെ കേരളത്തിന്റെ വിവിധ ജില്ലകളിൽ നിന്നും പോലീസ് അറസ്റ്റ് ചെയ്യുകയും ധാരാളം ഇലക്ട്രോണിക് ഉപകരണങ്ങൾ ഇതുമായി ബന്ധപ്പെട്ട് പിടിച്ചെടുക്കുകയുണ്ടായി. ഇന്റർനെറ്റിൽ കുട്ടികളുടെ അശ്ലീല ചിത്രങ്ങളും മറ്റും തിരയുന്നവരുടെയും കാണുന്നവരുടെയും കൂട്ടത്തിൽ പ്രായപൂർത്തിയാവാത്ത കുട്ടികൾ പോലും ഉൾപ്പെടുന്നു എന്ന വസ്തുത പ്രശ്നത്തിന്റെ ഗൗരവം കൂട്ടുന്നു. ഈ ലോക്ഡൗൺ കാലത്ത് പഠനാവശ്യത്തിനും മറ്റും കുട്ടികളുടെ കൈവശം ഇന്റർനെറ്റ് കണക്ഷൻ ഉള്ള ഇലക്ട്രോണിക് ഉപകരണങ്ങൾ നിയന്ത്രണങ്ങളില്ലാതെ എത്തിപ്പെട്ടതാകാം ഇത്തരം ദുരുപയോഗം വർദ്ധിക്കാൻ കാരണമെന്ന് സംശയിക്കപ്പെടുന്നു. ഇരകളാകുന്ന കുട്ടികളുടെ കൈവശമുള്ള ഉപകരണങ്ങളുടെ വെബ്ക്യാമുകൾ മാൽവെയറുകൾ ഉപയോഗിച്ച് അവരറിയാതെ സജീവമാക്കി നഗ്ന ചിത്രങ്ങളും മറ്റും ചിത്രീകരിക്കുന്ന രീതിയും റിപ്പോർട്ട്‌ ചെയ്യപ്പെട്ടിട്ടുണ്ട്.

കുട്ടികളുടെ നഗ്ന ചിത്രങ്ങളോ വീഡിയോകളോ ഇലക്ട്രോണിക് മാധ്യമങ്ങളിലൂടെ അയക്കുന്നതോ പ്രസിദ്ധീകരിക്കുന്നതോ ഇൻഫെർമേഷൻ ടെക്നോളജി നിയമ പ്രകാരം കുറ്റകരമാണ്. അതുപോലെ തന്നെ കുട്ടികളുടെ നഗ്ന ഫോട്ടോകളോ കുട്ടികളെ അശ്ലീലമായി ചിത്രീകരിക്കുന്ന എഴുത്തുകളോ ഫോട്ടോകളോ വീഡിയോകളോ സൂക്ഷിച്ചു വെക്കുന്നതോ ഇന്റർനെറ്റിൽ തിരയുന്നത് പോലുമോ Information Technology Act 67B വകുപ്പ് പ്രകാരം അഞ്ചു വർഷം വരെ തടവും പത്തു ലക്ഷം രൂപ പിഴയും ലഭിക്കുന്ന കുറ്റമാണ്. ഇതേ കുറ്റം ആവർത്തിക്കുന്ന പക്ഷം ഏഴു വർഷം വരെ തടവിന് ശിക്ഷിക്കപ്പെടും.

ഇതിൽ ഏറ്റവും പ്രധാനപ്പെട്ട കാര്യം കുട്ടികളെ കുറിച്ചുള്ള ലൈംഗിക കാര്യങ്ങൾ ഇന്റർനെറ്റിൽ തിരയുന്നതുപോലും ഈ വകുപ്പ് പ്രകാരം കുറ്റകരമാണ് എന്നതാണ്. ഇന്റർനെറ്റിൽ ഇത്തരം കാര്യങ്ങൾ തിരയുന്നതോ കുട്ടികളുടെ അശ്ലീല വീഡിയോയും ഫോട്ടോയും കാണുന്നതോ ഡൗൺ ലോഡ് ചെയ്യുന്നതോ നിയമപാലകർക്ക് കണ്ടു പിടിക്കാൻ കഴിയില്ല എന്ന തെറ്റായ ധാരണയിലാണ് പലരും ഇത്തരം നിയമ വിരുദ്ധമായ കാര്യങ്ങളിൽ ഏർപ്പെടുന്നത്. എന്നാൽ ഡാർക്ക്‌ നെറ്റിൽ നിന്ന് വരെ വിവരങ്ങൾ ശേഖരിക്കാൻ കഴിയുന്ന ആധുനിക സോഫ്റ്റ്‌വെയറുകളുടെ സഹായത്തോടെ അന്താരാഷ്ട്ര തലത്തിൽ കുട്ടികൾക്കെതിരെയുള്ള അതിക്രമങ്ങൾ തടയുന്നതിനായുള്ള ഇന്റർപോളിന്റെ ഒരു പ്രത്യേക യുണിറ്റ് ഏത് സമയത്തും ജാഗരൂഗരായി ഇരിക്കുന്നുണ്ട്. കേരളമടക്കമുള്ള എല്ലാ സംസ്ഥാന പോലീസ് അധികാരികൾക്കും അപ്പപ്പോൾ തന്നെ കുട്ടികളുടെ അശ്ലീല വീഡിയോയും ഫോട്ടോയും മറ്റും തിരയുന്നവരുടെ IP അഡ്രസ്സ് അടക്കമുള്ള വിവരങ്ങൾ ഇന്റർപോൾ കൈമാറുന്നുണ്ട്. കേരളത്തിൽ ഒരു ADGP യുടെ നേതൃത്വത്തിൽ കുട്ടികൾക്കെതിരെയുള്ള ലൈംഗിക അതിക്രമങ്ങൾ തടയുന്നതിനു വേണ്ടി CCSE (Countering Child Sexual Exploitation) എന്ന പേരിൽ ഒരു പ്രത്യേക പോലീസ് യൂണിറ്റ് ആരംഭിച്ചിട്ടുണ്ട്. ഈ യൂണിറ്റ് ഇന്റർപോളുമായി സഹകരിച്ച് പ്രവർത്തിക്കുന്നു. കേരളത്തിൽ ഈയിടെയുണ്ടായ പരിശോധനകളും അറസ്റ്റുകളും പോലീസ് ഇങ്ങനെ അപ്പപ്പോൾ ശേഖരിക്കുന്ന വിവരങ്ങളുടെ അടിസ്ഥാനത്തിൽ നടന്നതാണ്. ഇതോടെ കുട്ടികളുടെ അശ്ലീല ചിത്രങ്ങളും മറ്റും പ്രചരിപ്പിക്കുന്നതും കാണുന്നതും തിരയുന്നതും പോലുള്ള ഗൗരവതരമായ കുറ്റകൃത്യങ്ങൾ കുറയുമെന്ന് പ്രതീക്ഷിക്കാം.

Categories
Business Laws Editor's Picks Law for Public

ഉപഭോക്താവ്‌ പറ്റിക്കപെട്ടാൽ പരിഹാരം ഇതാ

വില കൊടുത്തു വാങ്ങുന്ന സാധനങ്ങൾ കേടുപാടുള്ളതോ പറഞ്ഞ നിലവാരമില്ലാത്തതോ ഒക്കെ ആയി നമ്മൾ പറ്റിക്കപ്പെടാറുണ്ട്. പലപ്പോഴും കേടുവന്ന സാധനങ്ങൾ മാറ്റി നൽകാൻ കടക്കാർ തയ്യാറാവാറില്ല. ഉപഭോക്താക്കളെ ചൂഷണത്തിൽ നിന്ന് സംരക്ഷിക്കുന്നതിനും, മായം ചേർത്തതും നിലവാരമില്ലാത്തതുമായ ചരക്കുകൾ വാങ്ങി പറ്റിക്കപ്പെടുന്നതിൽ നിന്നും, അപര്യാപ്തമായ സേവനങ്ങളിൽ നിന്നും അവരെ രക്ഷിക്കുന്നതിനുമായി ഉപഭോക്തൃ സംരക്ഷണ നിയമം 1986ഏപ്രിൽ 15 മുതൽ ഇന്ത്യയിൽ നിലവിൽ വന്നു. പിന്നീട് 1986 ലെ നിയമം റദ്ദ്‌ ചെയ്തുകൊണ്ട് 2020 ജൂലൈ മുതൽ ഉപഭോക്താവിന് കൂടുതൽ നിയമ സംരക്ഷണം നൽകിക്കൊണ്ട് പുതിയ ഉപഭോക്തൃ സംരക്ഷണ നിയമം നിലവിൽ വന്നു. ഓൺലൈനിൽ ഇടപാടുകൾ വർധിച്ചു വരുന്ന പുതിയ ലോകത്ത് ചൂഷണത്തിന് വിധേയരാകുന്ന ഓൺലൈൻ ഉപഭോക്താക്കളടക്കമുള്ള എല്ലാത്തരം ഉപഭോക്താക്കളുടെയും അവകാശങ്ങൾ സംരക്ഷിക്കുക എന്നതാണ് ഈ നിയമത്തിന്റെ മുഖ്യലക്ഷ്യം.

വില കൊടുത്തു എന്തെങ്കിലും സാധങ്ങൾ നേരിട്ടോ ഓൺലൈനിലോ വാങ്ങിയ വ്യക്തി, വാങ്ങിയ ആളുടെ അനുവാദത്തോടെ സാധനങ്ങൾ ഉപയോഗിച്ച വ്യക്തി, പണം കൊടുത്തു എന്തെങ്കിലും സേവനങ്ങൾ ഉപയോഗപ്പെടുത്തിയ വ്യക്തി എന്നിവരെ ഈ നിയമ പ്രകാരം ഉപഭോക്താവായി പരിഗണിക്കും. ഒരാൾ വില കൊടുത്തു വാങ്ങിയ സാധനം കേടുപാടുള്ളതോ വൈകല്യമുള്ളതോ ആവുക, പണം നൽകി പ്രയോജനപ്പെടുത്തിയ സേവനത്തിൽ പോരായ്മയോ അപര്യാപ്തതയോ നേരിടുക, നിയമപ്രകാരം നിശ്ചയിച്ച വിലയെക്കാൾ അതികം വാങ്ങുക, ആളുകളുടെ ജീവനും സുരക്ഷക്കും അപകടകരമായ സാധനങ്ങൾ വില്പന നടത്തുക എന്നീ സാഹചര്യങ്ങളിൽ ഇത്തരം സാധനങ്ങളോ സേവനങ്ങളോ വാങ്ങിയ ആൾക്ക് അതായത് ഉപഭോക്താവിനു പരിഹാരത്തിനായി ഉപഭോക്തൃ കോടതി അഥവാ ഉപഭോക്തൃ തർക്ക പരിഹാര കമ്മീഷനെ സമീപിക്കാവുന്നതാണ്.

സാധനങ്ങൾ വാങ്ങുമ്പോഴോ, സേവനങ്ങൾ ഉപയോഗപ്പെടുത്തുമ്പോഴോ ഉപഭോക്താക്കൾ വഞ്ചിക്കപ്പെടുന്നില്ല എന്നുറപ്പാക്കുന്നതിനാണ് ഉപഭോക്തൃസംരക്ഷണ നിയമം കൊണ്ട് ഉദ്ദേശിക്കുന്നത്. വളരെ വേഗത്തിലും ലളിതമായ നടപടിക്രമങ്ങളിലൂടെയും കുറഞ്ഞ ചെലവിലും ഉപഭോക്താക്കളെ തർക്കങ്ങൾ പരിഹരിക്കാൻ സഹായിക്കുന്നതാണ് ഈ നിയമം. ദേശീയതലത്തിൽ ദേശീയ ഉപഭോക്തൃ തർക്കപരിഹാര കമ്മീഷൻ, സംസ്ഥാന തലത്തിൽ സംസ്ഥാന ഉപഭോക്തൃ തർക്ക പരിഹാര കമ്മീഷൻ, ജില്ലകൾ തോറും ജില്ലാ ഉപഭോക്തൃ തർക്ക പരിഹാര കമ്മീഷൻ എന്നിങ്ങനെ മൂന്നുതരം സ്ഥാപനങ്ങളാണ് ഈ നിയമം നടപ്പാക്കാനുള്ള സംവിധാനങ്ങളായി പ്രവർത്തിക്കുന്നത്.

ബാങ്ക്, ധനകാര്യ സ്ഥാപനങ്ങൾ, ഇൻഷുറൻസ്, ട്രാൻസ്പോർട്ട്, ടെലിഫോൺ സർവീസ്, ഡോക്ടറുടെ സേവനം, ജല വിതരണം, വിദ്യാഭ്യാസ സ്ഥാപനങ്ങൾ, ഫ്ലാറ്റ് നിർമാതാക്കൾ, ഇൻഡ്യൻ റെയിൽവേ, ട്രാവൽ ഏജൻസി, ഹോട്ടൽ, പോസ്റ്റൽ സർവീസ്, ഇലക്ട്രിസിറ്റി ബോർഡ്, കൊറിയർ സർവീസ്, ഓൺലൈൻ വ്യാപാര സ്ഥാപനങ്ങൾ തുടങ്ങി പണം വാങ്ങി സാധനങ്ങൾ വില്പനനടത്തുന്നതോ സേവനങ്ങൾ നൽകുന്നതോ ആയ ഏതു വ്യക്തിയും സ്ഥാപനവും ഈ നിയമത്തിന്റെ പരിധിയിൽ വരുന്നതാണ്.

ഉപഭോക്തൃ തർക്ക പരിഹാര വേദികൾ

വാങ്ങിയ സാധനത്തിന്റേയോ സേവനത്തിന്റെയോ മൂല്യം ഒരു കോടിയിൽ കവിയാത്ത പരാതികൾ ജില്ലാ ഉപഭോക്തൃ തർക്കപരിഹാര കമ്മീഷനിൽ സമർപ്പിക്കാവുന്നതാണ്. ഒരു കോടി മുതൽ പത്ത് കോടി വരെയുള്ളവ സംസ്ഥാന കമ്മീഷനിലും പത്ത് കോടിക്ക് അധികമാണെങ്കിൽ ദേശീയ കമ്മീഷനിലും ആണ് പരാതി കൊടുക്കേണ്ടത്. പരാതിക്ക് ആസ്പദമായ സംഭവം ഉണ്ടായ സ്ഥലം, എതർകക്ഷി (കച്ചവടക്കാരൻ) താമസിക്കുന്നതോ പ്രവൃത്തി നടത്തുന്നതോ ആയ സ്ഥലം, അയാളുടെ ശാഖ പ്രവർത്തിക്കുന്ന സ്ഥലം, പരാതിക്കാരൻ താമസിക്കുകയോ ജോലി ചെയ്യുകയോ ചെയ്യുന്ന സ്ഥലം എന്നിവിടങ്ങളിലെ ഉപഭോക്തൃ തർക്കപരിഹാര കമ്മീഷനിൽ ഏതിലെങ്കിലും പരാതി സമർപ്പിക്കാവുന്നതാണ്.

പരാതി നൽകേണ്ട വിധം

പരാതി വെള്ളക്കടലാസിൽ എഴുതി നൽകുകയോ ഓൺലൈൻ ആയി സമർപ്പിക്കുകയോ ചെയ്യാം. നേരിട്ടോ പോസ്റ്റ് വഴിയോ പരാതി ഫയൽ ചെയ്യാം. പരാതി സമർപ്പിക്കുന്നതിന് മുമ്പ് നിങ്ങൾ എതിർകക്ഷിക്ക് വ്യക്തിപരമോ നിയമപരമോ ആയ അറിയിപ്പ് നൽകേണ്ടത് പ്രധാനമാണ്. പരാതിക്കൊപ്പം പരാതിയുടെ നാല് കോപ്പികൾ ഫയൽ ചെയ്യേണ്ടതുണ്ട്, കൂടാതെ കൂടുതൽ എതിർകക്ഷികൾ ഉണ്ടെങ്കിൽ ഓരോ എതിർ കക്ഷിക്കും അധിക പകർപ്പുകളും വെക്കണം. പരാതിക്കാരന്റെ വിലാസം എതിർകക്ഷിയുടെ (കച്ചവടക്കാരൻ/സേവനദാതാവ്) വിലാസം എന്നിവ രേഖപ്പെടുത്തിയിരിക്കണം. ഉത്പന്നം വാങ്ങിയതിന്റെ വിശദവിവരങ്ങൾ പരാതിയിൽ രേഖപ്പെടുത്തണം. ഉല്പന്നത്തിന് നിലവാരക്കുറവ്‌, കേടുപാട്, പ്രവർത്തനരാഹിത്യം, മായം തുടങ്ങി എന്താണോ ഉപഭോക്താവിന് തർക്കമായിട്ടുള്ളത് അവ അല്ലെങ്കിൽ അയാൾ തേടിയ സേവനത്തിന്റെ ന്യൂനത എന്താണോ അത് പരാതിയിൽ രേഖപ്പെടുത്തണം. ഉപഭോക്താവ് ആവശ്യപ്പെടുന്ന പരിഹാരം അഥവാ നിവർത്തികളും എഴുതണം. ജില്ലാ കമ്മിഷനിൽ പരാതികൾ സമർപ്പിക്കുന്നത് ഉപഭോക്തൃ നിയമത്തിന്റെ വകുപ്പ് 35 പ്രകാരമാണ്. പരാതിയോടൊപ്പം നിശ്ചിത ഫീസും നൽകേണ്ടതുണ്ട്. വാങ്ങിയ സാധനത്തിന്റെ വില 5 ലക്ഷം രൂപ വരെ ആണെങ്കിൽ പരാതിയോടൊപ്പം ഫീസ് അടക്കേണ്ടതില്ല. 5 ലക്ഷം മുതൽ 10 ലക്ഷത്തിന് താഴെവരെയുള്ളതിന് 200 രൂപയും 10 ലക്ഷം മുതൽ 20 ലക്ഷത്തിന് താഴെ വരെയുള്ളതിന് 400 രൂപയും ഫീസ് നൽകണം. 20 ലക്ഷത്തിന് മുകളിൽ 50 ലക്ഷം വരെ 1000 രൂപയും, 1 കോടി വരെ 2000 രൂപയും, 1 കോടിക്ക് മുകളിൽ 2 കോടി വരെ 2500 രൂപ, കേസിലുൾപ്പെട്ട സാധനത്തിന്റെയോ സേവനത്തിന്റെയോ വില പത്ത് കോടിക്കും മുകളിലാണെങ്കിൽ 7500 രൂപ എന്നിങ്ങനെയും ഫീസ് നൽകണം. ഫീസ് ഏതെങ്കിലും നാഷണലൈസ്ഡ് ബാങ്കിൽ നിന്നും എടുത്ത ക്രോസ്സ് ചെയ്ത ഡിമാൻഡ് ഡ്രാഫ്റ്റ് ആയോ ക്രോസ്സ് ചെയ്ത പോസ്റ്റൽ ഓർഡർ ആയോ ആണ് അടക്കേണ്ടത്. പ്രസിഡന്റ്, ഉപഭോക്തൃ തർക്ക പരിഹാര കമ്മീഷൻ (ജില്ലയുടെ പേര്) എന്ന പേരിലാണ് ഡിമാൻഡ് ഡ്രാഫ്റ്റോ പോസ്റ്റൽ ഓർഡറോ എടുക്കേണ്ടത്. പരാതിക്കാരൻ അവലംബിക്കുന്ന തെളിവുകളെന്തെങ്കിലുമുണ്ടെങ്കിൽ അവയും (രസീത്, ബില്ല്, കരാർ മുതലായവ) പരാതിക്കൊപ്പം ഹാജരാക്കാം. പരാതിക്കൊപ്പം രേഖകളുടെ ഫോട്ടോസ്റ്റാറ്റ് ഹാജരാക്കിയാൽ മതി. അസ്സൽ പിന്നീട് ഹാജരാക്കിയാൽ മതി.

പരാതിയിന്മേലുള്ള നടപടികൾ

ലഭിക്കുന്ന പരാതികൾ ഉപഭോക്തൃ കമ്മീഷൻ എതിർകക്ഷിക്ക് അയച്ചുകൊടുക്കുകയും അയാളോട് 30 ദിവസത്തിനകം മറുപടി ബോധിപ്പിക്കണമെന്നും നിർദ്ദേശിക്കുന്നു. മറുപടി ലഭിച്ചാലും ഇല്ലെങ്കിലും തർക്ക വിചാരണക്കായി തീയതി നിശ്ചയിക്കുകയും തുടർന്ന് പരാതിക്കാരന്റെയും എതിർകക്ഷിയുടെയും തെളിവ് രേഖപ്പെടുത്തുകയും ഭാഗം കേള്‍ക്കുകയും ചെയ്യും. മൂന്നുമാസത്തിനകം പരാതികളിൽ തീർപ്പുകല്പിക്കണമെന്നാണ് നിയമം അനുശാസിക്കുന്നത്. ഉപഭോക്തൃ കേസുകൾ അഭിഭാഷകന്റെ സഹായമില്ലാതെ, ഉപഭോക്താവിന് നേരിട്ട് നടത്താവുന്നതാണ്. ഈ കേസുകളിൽ തെളിവ് നിയമത്തിലെ വ്യവസ്ഥകൾ കർശനമായി പാലിക്കണമെന്ന നിബന്ധനയില്ല. ജില്ലാ കമ്മീഷൻ വിധിക്കെതിരെ സംസ്ഥാന കമ്മീഷനിലും സംസ്ഥാനകമ്മീഷൻ വിധിക്കെതിരെ ദേശീയ കമ്മീഷനിലും ദേശീയ കമ്മീഷൻ വിധിക്കെതിരെ സുപ്രീം കോടതിയിലും അപ്പീൽ ബോധിപ്പിക്കാം. വിധി പറഞ്ഞ് 30 ദിവസത്തിനുള്ളിൽ അപ്പീൽ ബോധിപ്പിക്കാവുന്നതാണ്. എന്നാൽ മതിയായ കാരണങ്ങൾ ഉണ്ടായാൽ 30 ദിവസം കഴിഞ്ഞുള്ള അപ്പീലുകളും സ്വീകരിക്കുന്നതാണ്. വിധി തിയ്യതി എന്ന് ഉദ്ദേശിക്കുന്നത് വിധിയുടെ കോപ്പി കയ്യിൽ കിട്ടുന്ന ദിവസമാണ്. എതിർകക്ഷിയെ ശല്യം ചെയ്യുന്നതിനു വേണ്ടിയുള്ളതോ ബാലിശമായതോ ആയ പരാതികൾ തള്ളിക്കളയാൻ കമ്മീഷനുകൾക്ക് അധികാരമുണ്ട്. കള്ള പരാതി നൽകുന്നവർക്കെതിരെ ശിക്ഷണ നടപടികൾ സ്വീകരിക്കാനും കമ്മീഷനുകൾക്ക് അധികാരമുണ്ട്.

ഉപഭോക്താവിന്റെ നിവൃത്തികൾ

ഉത്പന്നത്തിന്റെ കേടുപാടുകൾ പരിഹരിച്ച് നൽകുവാനും ഉപയോഗശൂന്യമായവ മാറ്റി പുതിയത് നൽകാനും വാങ്ങിയ വില തിരികെ നൽകുവാനും ഏതെങ്കിലും തരത്തിൽ നഷ്ടമുണ്ടാകുകയാണെങ്കിൽ ആയതിന് നഷ്ടപരിഹാരം നൽകുവാനും നിർദ്ദേശിക്കുന്നതിനുള്ള അധികാരം ഉപഭോക്തൃ ഫോറങ്ങൾക്കുണ്ട്. ഈ ഉത്തരവുകൾ ലംഘിക്കപ്പെട്ടാൽ അറസ്റ്റ് ചെയ്ത് ജയിലിലേക്കയയ്ക്കുവാനും നിയമത്തിൽ വ്യവസ്ഥയുണ്ട്. വ്യക്തികൾക്ക് നേരിട്ടോ, കൂട്ടായോ, അംഗീകൃത ഉപഭോക്തൃ സംഘടനകൾക്കോ പരാതികൾ നൽകാവുന്നതാണ്.

Categories
Law for Public

ഡോക്ടറുടെ അശ്രദ്ധകൊണ്ടുള്ള അപകടത്തിനും പരിഹാരമുണ്ട്

ഡോക്ടേഴ്സിനെതിരെയും പാരാമെഡിക്കൽസിനെതിരെയുമുള്ള അതിക്രമങ്ങൾക്കെതിരെ ഒരു നിയമം കേന്ദ്ര ഗവൺമെന്റിന്റെ പരിഗണനയിൽ ആണെന്നുള്ള വിഷയം നമ്മൾ മുമ്പ് ചർച്ച ചെയ്തിരുന്നു. ആയതിന് ശേഷം ഡോക്ടേഴ്സിന്റെ അശ്രദ്ധക്കെതിരെ രോഗികൾക്ക് പരിഹാരമായി നിയമങ്ങൾ ഒന്നും നിലവിൽ ഇല്ലേ എന്നുള്ള ഒരു ചോദ്യം പല മേഘലകളിൽ നിന്നും ഉണ്ടായിരുന്നു. രോഗികൾക്കും നിയമ പരിരക്ഷയുണ്ട് എന്ന് അറിയുക. ഒരു ഡോക്ടർ ഒരു രോഗിയെ ചികിത്സച്ചതിനു ശേഷം ഈ രോഗിക്ക് എന്തെങ്കിലും തരത്തിലുള്ള പാർശ്വഫലങ്ങളോ മുറിവുകളോ അല്ലെങ്കിൽ മരണം വരെയും സംഭവിച്ചു കഴിഞ്ഞാൽ എന്താണ്പ്രതിവിധി എന്നുള്ളത് പലർക്കും അറിയില്ല. അതിനും പരിഹാരം ഇന്ത്യൻ നിയമങ്ങളിൽ തന്നെ ഉണ്ടെന്നാണ് സത്യം . ഇന്ത്യൻ പീനൽ കോഡിൽ 337,338 അത് പോലെ മരണം സംഭവിച്ച് കഴിഞ്ഞാൽ 304A എന്നീ വകുപ്പുകൾ ചുമത്തി ചികിത്സയിൽ അശ്രദ്ധ വരുത്തിയ ഡോക്ടർക്കെതിരെ നിയമ നടപടി എടുക്കാവുന്നതാണ്. ഇതിന് നമ്മൾ ചെയ്യേണ്ടത് ഇത്തരം ഒരു അശ്രദ്ധ ഒരു ഡോക്ടറുടെ അടുത്ത് നിന്ന് വന്നാൽ അടുത്തുള്ള പോലീസ് സ്റ്റേഷനിൽ പോയി ഈ കാര്യങ്ങൾ വിശദീകരിച്ച് കൊണ്ട് എനിക്ക് ഇത്തരത്തിലുള്ള ഒരു അപകടം അല്ലെങ്കിൽ ഇന്ന രീതിയിലുള്ള പാർശ്വഫലങ്ങൾ സംഭവിച്ചു എന്നുള്ള കാര്യം ബോധിപ്പിക്കാം. അതുപോലെ തന്നെ പോലീസ് ഈ പരാതി വേണ്ട രീതിയിൽ പരിഗണിക്കുന്നില്ല ഒരു എഫ്. ഐ .ആർ രജിസ്റ്റർ ചെയ്യുന്നില്ല എന്നുള്ള അവസരത്തിൽ നേരിട്ട് കോടതിയെ സമീപിച്ച് പരാതിയായി കോടതിയിൽ ബോധിപ്പിക്കാവുന്നതാണ്.

പക്ഷേ സുപ്രീം കോടതി ഡോക്ടർക്കെതിരെ ഏതൊക്കെ സാഹചര്യങ്ങളിൽ ഒരു ക്രിമിനൽ കേസ് എടുക്കാം എന്നതിനെ കുറിച്ച് ജേക്കബ്മാത്യൂ വേഴ്സസ് സ്റ്റേറ്റ് ഓഫ് പഞ്ചാബ് എന്ന കേസിൽ വളരെ വിശദമായ ഒരു വിധി പറഞ്ഞിട്ടുണ്ട്. അതിൽ പറയുന്നത് ഒരു സാധാരണ അശ്രദ്ധ ഒരു ഡോക്ടർക്കെതിരെ ക്രിമിനൽ നിയമ നടപടി എടുക്കുന്നതിന് പര്യാപ്തമല്ല എന്നാണ്. സാധാരണ ഗതിയിൽ ഒരു ഡോക്ടറും ചികിത്സക്കിടെ ചെയ്യാത്ത കാര്യങ്ങൾ ആരോപണ വിധേയനായ ഡോക്ടർ ചെയ്താൽ മാത്രമേ ക്രിമിനൽ നിയമ നടപടികൾ എടുക്കാൻ പാടുള്ളൂ എന്ന് കൃത്യമായി സുപ്രീം കോടതി പറഞ്ഞു വെച്ചു. അതു മാത്രമല്ല അതിന്റെ കൂടെ ഒരു ഡോക്ടർക്കെതിരെ ഒരു ക്രിമിനൽ നടപടി എടുക്കണമെങ്കിൽ ജില്ലാ മെഡിക്കൽ ഓഫീസർ അടക്കമുള്ള വിദഗ്ദ്ധ ഡോക്ടർമാർ അടങ്ങിയ ബോർഡ് ഡോക്ടറുടെ ഭാഗത്ത് കാര്യമായ അശ്രദ്ധ ഉണ്ട് എന്നുള്ള ഒരു റിപ്പോർട്ട് കൊടുത്താൽ മാത്രമേ പോലീസ് ഡോക്ടർക്കെതിരെ കോടതിയിൽ കേസ് ഫയൽ ചെയ്യാൻ പാടുള്ളൂ എന്നും ഈ വിധിയിൽ പറയുന്നു. ഡോക്ടർ എടുത്ത ഒരു തീരുമാനം തെറ്റിയിട്ടാണ് അപകടം സംഭവിച്ചത് എങ്കിൽ പോലും ആ ഡോക്ടർക്കെതിരെ ക്രിമിനൽ നിയമ നടപടിക്ക് സാധ്യത ഇല്ല. പക്ഷെ രോഗിക്കോ ബന്ധുക്കൾക്കോ സിവിൽ ആയി നിയമ നടപടികൾസ്വീകരിക്കാൻ കഴിയും. അതായത് കൺസ്യുമർ കോടതിയിലോ മറ്റു സിവിൽ കോടതിയിലോ കേസ് കൊടുത്ത്‌ നഷ്ട്ടപരിഹാരം ഡോക്ടറിൽ നിന്നോ ബന്ധപെട്ട ആശുപത്രികളിൽ നിന്നോ വാങ്ങിയെടുക്കാം.
ചുരുക്കത്തിൽ ഡോക്ടറുടെ അശ്രദ്ധ കൊണ്ട് ഒരു രോഗിക്ക് അപകടമോ മരണമോ സംഭവിച്ചാൽ ഡോക്ടർക്കെതിരെ ക്രിമിനലായോ സിവിൽ ആയോ നിയമ നടപടി സ്വീകരിക്കാം. പക്ഷെ സുപ്രീം കോടതി ജേക്കബ് മാത്യു വേഴ്സസ് സ്റ്റേറ്റ് ഓഫ് പഞ്ചാബ് കേസിൽ പറഞ്ഞ പോലെ ഒരു മെഡിക്കൽ ബോർഡ് ഡോക്ടർ വലിയതരത്തിലുള്ള അശ്രദ്ധ കാണിച്ചു എന്ന് പറഞ്ഞാൽ മാത്രമാണ് ക്രമിനൽ ആയി നടപടി എടുക്കാൻ കഴിയൂ. കൺസ്യുമർ ഫോറത്തിലോ സിവിൽ കോടതിയിലോ ഡോക്ടർക്കോ ഹോസ്പിറ്റലിനോ എതിരെ കേസ്കൊടുക്കുന്നതിനു ഈ തടസ്സമില്ല. പക്ഷെ ഇത്തരം ഒരു അശ്രദ്ധ ഡോക്ടറുടെ അടുത്ത് നിന്നുണ്ടായി എന്ന് തെളിയിക്കേണ്ടതായിട്ടുണ്ട്. അതിന് വേണ്ട തെളിവുകൾ കോടതിയിൽ ബോധിപ്പിക്കേണ്ടി വരും.
പക്ഷെ വ്യാജവൈദ്യൻമാരുടെ ചികിത്സാഫലമായിട്ടാണ് ഇത്തരം അപകടങ്ങൾ സംഭവിക്കുന്നത് എങ്കിൽ സുപ്രീം കോടതി ജേക്കബ് മാത്യു വേഴ്സസ് സ്റ്റേറ്റ് ഓഫ് പഞ്ചാബിൽ പറഞ്ഞ പോലുള്ള പ്രൊട്ടക്ഷൻ വ്യാജവൈദ്യന്മാർക്ക് ലഭിക്കില്ല എന്നുള്ളത്കൂടി ഓർക്കേണ്ടതാണ്. അവരെ നിയമ പരമായി കൈകാര്യം ചെയ്യാൻ നിയമത്തിൽ മറ്റു കാര്യങ്ങളും പറയുന്നുണ്ട്. ചുരുക്കത്തിൽ ഒരു ഡോക്ടർ
ചികിത്സക്കിടെ വലിയ അശ്രദ്ധ കാണിച്ചാൽ മാത്രമേ ക്രമിനൽ നടപടികൾ എടുക്കാൻ കഴിയുകയുള്ളൂ. മരണം വരെ സംഭവിച്ചാൽ പോലും ക്രമിനൽ നടപടി എടുക്കണമെങ്കിൽ വളരെ വലിയ രീതിയിലുള്ള അശ്രദ്ധ ഡോക്ടറുടെ ഭാഗത്ത്‌ നിന്നും ഉണ്ടായി എന്ന് മെഡിക്കൽ ബോർഡ് പറയണം. ഡോക്ടർ ഒരു റീസണബിൾ കെയർ തന്റെ പ്രാക്ടീസിൽ എടുക്കുകയാണെങ്കിൽ ഈ ക്രമിനൽ നടപടി എടുക്കാൻ സാധിക്കില്ല. പക്ഷെ ഡോക്ടർക്കെതിരെ സിവിൽ ആയി നടപടികൾ എടുത്ത് നഷ്ടപരിഹാരം വാങ്ങാവുന്നതാണ്.